Category Archives: Punjabi

بھریاں ہویئاں اکھاں

گھِر دا جاندا ہانہہ

بھُبھل ہویا سینہ

سِر توں اُچی بانہہ

میں ٹریا تاں آل دوالا

بدلاں وانگ سی تردا

چُپ سی تھل ماڑو دا ریتا

دُھپ دا مینہہ سی وسدا

چار چوفیروں تے اندروں وی

میں ساں اینا اکیا

خبرے اوہ کتھے سی اُسلے

!میں نہیں مڑ کے تکیا 

کھنگر اِٹ دی محل ماڑیاں

نہیں پوچے دی لوڑ

سندلے بنھ پِٹیون اوکھا

نہ ہاسے دی تھوڑ

چھت تے ناہری دھپ دی ٹولی

پاندی پھرے دھمال

بھمبنی اتے بُت مور دا

نچے وا دے نال

ساوے پپلاں نال کھلوتے

نِمو جُھون شرینہہ

تس دے مارے رپڑاں اوہلے

میں تے وسدا مینہہ

اینویں آل دوالے وسدے

شک پئے کردے میتھے

ورھیاں پہلاں وی اک واری

میں آیا ساں ایتھے